@ مكتبة الفاضل سيف الدين التوثيقية @
 
الرئيسيةالبوابةاليوميةس .و .جبحـثالأعضاءالمجموعاتالتسجيلدخول

شاطر | 
 

 @ الراندوك لغة حية في الشارع السوداني @

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
الفاضل سيف الدين

avatar

عدد المساهمات : 58
تاريخ التسجيل : 14/07/2010

مُساهمةموضوع: @ الراندوك لغة حية في الشارع السوداني @   الجمعة يوليو 16, 2010 1:26 am

§ الحلقه الاولي §
‎وابدأ بأعطاء فكرة عامة عن قاموس الراندوك :
زردرد : تعني صاحبي او الفردة
الناموسة : تعني الحبيبة وتطلق علي البنت التي لديها علاقة مع احدهم
فتريتا : فتران او تعبان
ابوحمامة : اخذت حمام من الصباح للنشاط
الشوال : دي مسمي لبعض البناطلين في السوق السوداني وهو كبير من الاسفل زي ماتقول كدي موضة
الشاش : تعني الشارع ( والراندوك لا يقتصر علي تغيير الكلمة ولكن ايضا يمكن ان تختصر الكلمة مع وضع حرف او حرفين زيادة فيتغير نطق الكلمة
دامة : الدامة دي بنت الكشتينة وتطلق علي البنت
البلي : ولد الكشتينة وتطلق علي الولد
البايظ : بايظ الكشتينة يعني وفي القصة القصيرة الماضية يقصد به الحنك ( سوري فتح موضوح مع البنت يعني وكده )
رمال حلتنا : الشباب الذين تجدهم في كل شارع يعني زي الرملة ( لما الشباب وصلو عمك غلبو التعبير طوالي دخل في الترحيل وحمد الله
شرحبيل : شره في الشارع.في لغة الراندوك أيضاً أستعملت بعض الألفاظ والتي تدل على الفنانين أو الأسماء اللامعة في المجتمع :

خوجلي عثمان : تعني الخجل - يقول ليك والله البت دي خوجلي عثمان أي خجولة .
فاطنة الحاج : تعني الفطور - والله الليلة فاطنة الحاج سكو ( ما في )
عشة الفلاتية : تعني العشاء - يلا نعمل عشة الفلاتية .
الفاتح النقر ، فتحي فرج الله : التجاهل - أفتح ليه كبري
عبدالعظيم حركة : عامل حركات .
عمر إحساس : متحسس شوية .
زيدان إبراهيم : تعني الوصلة - زيادة أكل
صلاح مصطفى : تعني الإصلاح بين الشخصين .
علي السقيد : الشخص الذي يحب السهر ( السُقُد ) .
كمال ترباس : قفلت الموضوع ( ولا يحتاج لنقاش ) .على كل فآباؤكم شهدوا مثل هذا الترميز ولكن على خفيف !
قالوا في واحد سرق ليهو بهائم وباعها . واتهمه أصحابها والتهمة راكباه ١٠٠% لوفرة الأدلة . وفي المحكمة الأهلية الكلمة النهائية للعمدة كما هو مقنن. سأله العمدة وكان يأكل الرشوة:
أنت اسمك شنو؟
رابح.
رابح ود منو؟
رابح ود قاسم
قاسم ود منو ؟
قاسم ود النص
ففهمها العمدة وقال له:
انت من أولاد ود النص ؟ على الطلاق أولاد ود النص أنا بعرفهم أشرف ناس وما فيهم زول بيسرق. وقال لأهل الشكوى: أمشوا شوفوا السرق بهائمكم !!!


الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://‏‎http://bushra.ahlamuntada.com/admin/index.forum?mode=em
الفاضل سيف الدين

avatar

عدد المساهمات : 58
تاريخ التسجيل : 14/07/2010

مُساهمةموضوع: @ الراندوك الحلقة الثانية @   الجمعة يوليو 16, 2010 1:58 am

طبعا ياعمك أخوك حايشوف ليك المكنيكيا وكدا
البلف
نيسان جنا اليابان مدنكس من ورا عالى من قدام
تفطر فى الجنينه تتغدى فى بورسودان
لالستك نام لاشمبر قام
أريل مقيل الشواطين مكنه تسب كرونه تقول أستغفر الله العظيم
السواق
يابلف ماتكورك
البلف ياخى ديل طلبه نحن سليقين لينا فصل
السواق
شنويعنى ننهر
البلف دقيقه دقيقه دقيقه يلا يا حاجه يلا يلا سياحه وركوب براحه وبلاش طراحه
مقاعد سسته معلم اسطى يلا البسطه المحطه الاسطى عليك الله ماتقعد لينا فى مقعد النص
اسمع ياعمك شتت ماتقيف ليه دا عارض دا يااااااخ ورم والله ياعمك صاحبك يركب هنا
البرى دا شايفو يتحوك اتفكفك ياخى يازول جر الشارع
السواق
يابلف طقطقم يعنى اخلص
ساعدونا بالفكه طلبه مافى ماشين بالاربعين عمك عمر دا قالو عندو عوك عروروك. والراندوك انواع تقيل وخفيف..وهذا من التقيل * * * ست بوبار السايب شرشور ..
سحية ترتار سدية نعناع ، سلغة بوبار السندكة رمان ..
سوست بوبار سذيذ ليمون سديد شرشور
دى من الراندوك الاصلى لكن في الرندوك اسمها( السربعة .) * ترا ترا ياللستك الورا .... وبندورة وكشفنا دورا ... البوبار يادموع الحمار ... جنرتى ... اعمل شخيت واقيف بعيد ........
دة اسمو( الردحي) دة مابستعملو الشماشة كلو كلو دة بيستعمل في مجتمعات معينة لا مواخذة

* شرتيت .. حسس .. فردة ... زوغبير ... فكفكنا .. الجلكين ..
دى لغة الشماشة في الشارع (الراندوك) وبترتبط دايماً بالجو السايد حول الشماشة ...
ودايماً فيها كلامات مركبة ومواكبة للأحداس... مثال : ( فصل الدين عن الدولة ) دة معناتو البت
اللابسة بلوزة قصيرة .. ونص بطنها كاشف ...:

وكلامات زى (رافع لينا القزاز ) ..( وكسير التلج).. ودايما مواكبة وهى لوغة لاتموت ( حركات انجلو في المطار )..... الخ
ودة دايماً بستعملوه الكماسرة والسواقين

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://‏‎http://bushra.ahlamuntada.com/admin/index.forum?mode=em
 
@ الراندوك لغة حية في الشارع السوداني @
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
@ مكتبة الفاضل سيف الدين المساعد @ :: الفئة الأولى :: @ قهوة النشاط @-
انتقل الى: